متأخذونيش.......... لــــــــ على جامع.........صفوة الكُتَّاب العرب

سيفى الخشب سوّس
ولسانى نام على معدتى الخاويه
أضعف ايمانى على الحياد
أعزل انا منّى
وانت القزاز والطوب
مين اللى يستجرى؟
د انت اللى رضّعتنا
كافة حروف الخوف
لما احنا كنا صغار
مكانشى فيه حواديت على ايامنا
غير أمنّا الغوله
ولا كنّا نعرف عنك انك غول
وعرفنا لكن بعد ماكبرنا
ليه انت مضحكتش لأيامنا
يادى ال ..........
ياللى انت مستكتر علينا نكون ولاد
بين الولاد زى الألف
منصبتناش
ولاحتى ممكن نتنصب
مين اللى يعدل مُنحنَىْ الضَهر اللى أيبس م الحجر
الا ان كَسَر
نظره ومدد ياام العواجز
حوالين مقامك مُتّسَع
مش مُتّسِع
للمعدومين
والمعدومين النخوه لاهطين البلد
حادق وحلو
ودا لانّهم على حد قولهم
شاريينها بور
والأهرامات
كانت بذور
رشّوها من قبل الميلاد
طرحت وجواها الولاد
خفرع وخوفو ومنقرع
علشان كدا
نازلين يبيعوم للأجانب كل يوم
ولايدوناش
والهول أبوه زكم الأنوف
والشم أبطل حاسته
ايه كان هيجرى لو احنا كنا قطعناهاش
ايه يعنى مناخير فى البلد
ايه يعنى لما نروح بلاش؟
متأخذونيش
متأخذوناش
فى الحلق كلمه ماقلنهاش
بلاش نقولها
واللا مانقولهاش بلاش