أيوه انا شــــــــــاعر........ لــــــــ على جامع.........صفوة الكُتَّاب العرب

أنا مش شاعر
أنا زنزانه لكل مشاعر شاعر ( فالصو )
خاف جلّاد
شافه بيلهب ( ضهر )بيتين م الشعر الحر
كانوا لشاعر
خاف يكتبهم جوه ديوان مسموح له بنشره
نطّوا (ف ) قلب ديوان الشاعر
( المطبعجى ) ماهوش ذوّاق
ضاع الشعر وراح الشاعر
يكتب شعره ف ( واق الواق )

أنا مش شاعر
بس باحس يوماتى بهزّه بتقلق خوفى
وبتتمرد على عصيانى
صوت سمواتى بيصرخ فيا
اكتب تانى
ضايع قلمى ونص لسانى
اكتب تانى
خوفى بيقتل أى معانى
اكتب : واوعك تكدب تانى

أيوه انا شاعر
كان لى ميدان وحصان سبّاق
وقت الشعر ماكان يتسمم
كنت باكون له دوا وترياق
بس الخيبه
لما المعنى الحر يابلدى
يصبح عيبه
تصبح أى قصيده نفاق
أيوه انا شاعر
مهما هاقاسى ومهما هاعانى
هابعد وارجع واكتب تانى
ويّا نصير الكلمه الحره
اللى نفوه لبلاد الواق .