بالعراقي ... هلهلي يعورة...........لــــــ الشاعر مجيد عبد طاهر..........صفوة الكُتَّاب العرب

هلهلي ياعورة
جنّا ازغار نسمع هالمثل ينكال
ومن لمن كبرنا اتضحت الصورة
عرفنا اليا سبب هذا المثل كالوه
وشنهو المغزة منه بفرحة العورة
اثاري العورة مسكينة تشوف بعين
وحدة وتحمد الله وهي مجبورة
وهسة برحمة الله اصبح شعب عوران
يشوف البطة يمة يظنها عصفورة
مايكدر يوجد بالغلط غركان
خربانه الديار يكول معمورة
يتغنى ويصفك بس تميل الريح
يميل وياها ميلة سعفة مكسورة
يتمختر تشوفة تكول ابو العريف
وهو تسوكة عصّة يصيح مشكورة
يمشي اعلى الحجي وعمياوي بي ينكاد
ويصدك قناة اعلام مأجورة
المهم طائفته عندة ومايحس بالماي
يجري يحفر تحتة وروحة مسحورة
جن ماله عقل يكعد يفكر بي
ويتكاتف سوية وينهض بدورة
اصحى ياشعب نومك ثجيل هواي
انته التنذبح والناس مسرورة
خل عقلك دليلك مو حجي الينكال
من مشتي حسن لوصفا وعرعورة
شوف اشصار باهلك من خراب وضيم
تشريد ويتامة وثكله مقهورة
ومن ينهتك ستر الحرة من تنكاد
تطخ الراس اظن وتكول معذورة
انته بغير دنيا متابع الاخبار
والحرّة بهذاك الصوب مغدورة
دمارك والذبح يتباهى بي صهيون
هو انته الذبيحة بسوك مجرورة
متخدر ولاجنك تشوف بعين
ولك حتى النجف ماكفّت اكبورة
لم شملك تراها وصلت البلعوم
واتقوى ابعمامك واحفظ الجورة
خل ايدك بديهم واطرد الغشوك
والراية التلم الشمل منصورة