انت وانا.......... لـــــــــ رضا ابو حسين.......صفوة الكُتَّاب العرب ·

تلاتين سنه...
ياقلب محروم م الهنا
عمرك مادقت ف يوم حنان
ولا ليل سهرته ف الجوى
كل اللي انت عرفتهم
مجاريح ومش لاقيين دوا
ومهما كان ايه العدد
مش محسوبين اهل الهوى

شوف كام سنه... ومازلت انا
باشرب مرار
طفحان ضنى
عايش بادعبس
وسط كراكيب السنين
على يوم هنا
اااااه يااااانا
كات شغلتي شيال حمول
دلوقت ضهري اهو اتحنى
غرقان لشوشتي ف الهموم
واهاتي الحان .... للغنا

(تبت يداي فإنني
مازلت ابحث
بين أروقة الزمن
عمن أنا )

تلاتيييين سنه
لسايا برضه مش عارفني
مين انا
عايش كأني مش هنا
قلبي اللي كان
زي استراحه للحريم
عمره ماداق طعم الهنا
وكل واحده بتعرفه ...
تستنزفه
وتسيبوا دقاته بسواد ..
متلونه
اهين ياقلبي ويا انا
عمرك ماكانلك ف اللبط
طب ايه رماك ف المطحنه
اياك تفكر ان بكره
هايكون خلاص
يوم المنى
ماتفوق بقا
ياجته واخده ع الشقا
مكتوب علينا الشحططه
ومحرومين من اللقا
انت وانا
انت وانا
شوف كام سنه