يا ولدى.......... لـــــ شاعر الروائع / أشرف فؤاد السمادونى..........صفوة الكُتَّاب العرب

اوعاك تعيّط يا ولدى
لو بِت يوم مغلوب
هيفيد بايه البُكا
لو اللبن مسكوب
خليك خليل دُنيتك
هتعيش سعيد محبوب
واجمد أوى ف شِدِّتك
ياابنى الايمان مطلوب
ياما ناس تنام ع الحرير
وناس تنام ع الطوب
النومه مش بالترف
والراحه تحييِ قلوب
فى ناس عشاها دُعا
وناس عشاها ذنوب
نفسى أشوفك يا ولدى
يا حلمى يا محجوب
تيجى تونس حبيبتك
وتكون لها المطلوب
صابر على غُربتك
وراضى بالمكتوب
أملى أشوف طَلِّتك
مولانا رب قلوب
والعشق لو غيّتك
اعشق معايا ودوب
وهشوف ف يوم سكتك
وكله م المكتوب
اوعاك تعيّط يا ولدى
لو بِت يوم مغلوب
واصبر على بلوتك
ما تشيلش ياابنى ذنوب
واصبر يا ولدى أوى
خليك حجر ما يدوب
وانسى كلام الناس
ما تكونش يوم معيوب
صبرك على دُنيتك
يكسر شيطان مغلوب
ودارى على شمعتك
نوَّر طُرق ودروب
الحزن لو غلِّبَك
اصبر عليه هيدوب
مهما الزمان كتِّفَك
احلم شروق ف غروب
بالحلم عيش دنيتك
وارضى بالمكتوب
واوعاك تعيَّط يا ولدى
لو بِت يوم مغلوب