هيك الوطن...... لـــــ الشاعرة فتون الحسن‏......صفوة الكُتَّاب العرب ·

سهران.. زهر الفل
ع حدود الزمن
متل للي ناطر.. ترجع ليالي الوطن
هاك الشوارع.. شو حمت عشاق
وشو خبرت عنها الشجر... شو وشوشت الوراق
وطفل للي كان.. برفقتو طفلة
صاروا رماد.. بلحظة الغفلة
ومدارس لكانت.. ضحك الولاد
هيك انطفت.. وتغربت العياد
والأم... لي ندرت لعرس ولادها ..قلبا
ماعاد غير الآس .. عا دربا
ضلك ي زهر الفل ..متخبي
لا تغرقك .. دمعات من قلبي
صلي بليلك.. ترجع دروب الهنا
بلكي الصلا بتردنا.. وبرجع أنا
وبكسر حدود الليل عن بابي
وبيرجع الحلم لدبل.. وبيرجعوا حبابي
متلك أنا..حملت الفرح قصة
ودبلت عروقي .. ونبضها غصة
نمت بحلم ..وصحيت ع بلادي
صوتا جرحني
تصيح ... "ي ولادي"
هالأم
شو سهرت ليالي
تشتكي وما نسمعا
كبرت ع جرحا
وشو كبر جرحا معا
هيدي الحبيبة.. تجرحت
وجروحها سالت نهر
ما ضل منها
غير كمشة هالندي ببال السهر
وبعدك ي قلبي .. ع الوما بتبكي
وبعدا زهور الفل .. عم تحكي
وبعدو الوطن .. لا بيشتكي .. ولا بيعترف أنو انجرحْ
هيك الوطن .. ضحكة بغمرة هالبكي
متل الحلم .. متربع ببالو الفرحْ