حلم....... لــــــ مبرفت حمودة ........ صفوة الكُتَّاب العرب

باشوف نفسى
وأنا تايهه
بلا عنوان
ودربى طويل
مالوش آخر
مافيه انسان
على جنابه
بذور الصبر مزروعة
بلا عمدان
وبحره غويط
ماله آخر ولا شطآن
سفن رايحة
وسفن جاية
وأنا سفينتى
ماليها مكان
أحس بعصر أنفاسى
وأنادى بكل أحساسى
يرد صدايا جوايا
يقول ده كان
أقول ياناس أنا عايشه
ومش هامش
ومش طالبه كمان أحسان
وأحوش الدمع جوايا
وأقول يا نفس
كده كفاية
تقولى خلاص
ما انا أتعودت على الحرمان
أمد ايديا مرفوعه
وطالبه نجاة
تلاقى القشة مخدوعة
ورافضة حياة
تموت الآهة جوايا
بكل هوان
سنين العمر واخدانى
وماشية بعيد
لا عارفة تروح ولا تيجى
بلا مواعيد
ومسجونة بلا نهاية ولا سجان
هأدوس على قلبى بايديا
واقول وبعزم مافيا
أنا خايفة
لا يجى اليوم
ويعصرنى الضنا بايده
وألاقينى بأبات ندمان
يارب انت اللى خالقنى
،وعارفنى
ومهما ذنوبى غمرتنى
ماليش غيرك
تنجينى من الطوفان