أسقاط على يوم قديم : العجوزة (4)....... لـ /أحمد البدرى على..........صفوة الكُتَّاب العرب

بتحوش ليالي العمر
فى( سباتة )
وتحت (الخـُص) (1)
خريطة العمر مرسومه
ومحفوره يا دوب ع الوش
ملامح زيف بترمح( رمح ) (2)
( تـكرمش) وش قمح النيل (3)
وإيد (مرعوشه ) وبتمسح
جـَبين كام ليل
وجسم هذيل كما النخلة
يميل يحضن فى كل أصيل
و(منخار) النظر باهت (4)
(بتعسعس) فى وش الصبح (5)
أنا (سنداه) (عشيه ) حاجات (6)
(أ ُم على ) بتنور سواد الليل (7)
( جاز ) المحبة (عويل) بينور (8)
فى كل (رِواق)(9)
سامعني يا واد ؟
(عنادى ) الدنيا محبوسه (10)
على سبحه وسجادة
وخاتم يعنى م (الفلصو) (11)
حديد وبفص كالعادة
وعـُقد (النـَيلوا)كام خرزة (12)
بيلمع فـَضي بزيادة
(دِبارة ) صوف و(عاصماها )(13)
لـ ( فـَكْ) الإيد مصاحبها (14)
(حلقان ) الودن مربوطه (15)
بخيط كتان
ودق (الوشم ) تحت الدقن
تلات وحدات
عليها حاجات !!!!!!
حالها كاحال ولاد الناس
تتسلي بأواجعها ع الماضي
وأنا قاضى يسطر قلبى دمعتها
ساعات تفرش لى طرحتها
وأنام علي حجرها وأتغطى ب(التـُلى )(16)
بطبط وبتقولى ( نوم العوافى )
تغافلنى وتتسحب ع (الــِرواق )
وتفتح ( طاقة ) الخزنه ف قلب الحيط(17)
ومن حـُقْ الصفيح تجـِيب لي حاجات
(قـِطـَع )سكر وكام (تعريفة ) مش صفرة (18)
( نواكل ) (ملاليم ) و (قرش أبيض )
وتحكي معايا بالساعات
كنا نبيع ونشترى كل شئ بالبيض
وكان (السلف ) عادة لـ كل هد وم
اللى معاها (جلابية ) تلف الحىّ
بــ (القبقاب ) مفيش شراب
(تبص ) فـ وشى أصفر ليه
كيف الشمس فى غروبها
ياااااك يا واد محسود !؟
وتشبر علي راسى
وع الجلبيه طول وعرض
يا وااااد الكلب
مش قولت متروحشى
عند أم عين صفرا
دا أم فلان حـَسّادة
عينيها مدورة ونقمه
عليا النعمه لو شفتك
حداها هناك ما (أغيتك )(19)
جابت أبره وورقة برد
عملت عروسه و( تنكت ) (20)
فى عين فلان وعين فلاتان
و فى (عين اللى شافك
ولا صلاش ع النبي )
بعود بخور علي حفنه من الجلة
بتبخر وبتخمس وتتمني
نكون أنا وانت في الجنه
وتميل علي ودني (توسوسني)
هقولك كلمة للدنيا وتهمس لي
الدنيا (غيط ) وزرع (21)
وبكره بعدهُ ( اللحد )(22)
أزرع عشان تحصد
دنيا ماليها أمان
ولا دايمه ياابنى لحد