ضياع........ لـــــــــــــ شاعر الروائع / أشرف فؤاد السمادونى.............صفوة الكُتَّاب العرب

من فات قديمه تاه
ضاعت حكايته معاه
من بطن امك جيت
عرفت آلامها الآه
من ضهر ابوك عديت
وحلمه كان ف صباه
وف قلب اسره وبيت
دبت فيك الحياه
وعرفت تسرق حلم
وف لحظه واحده تبيع
فرقت ليه الشمل
وهان عليك الحلم
القلب ليه اصبح حجر
وطموح بهيه الطيبه
بايديك خنقته وانتحر
يا انانى يا فضلة بشر
خليك بعيد .خليك وحيد
يمكن ف يوم لحظة خطر
وتشوف عنيك اللى انكسر
وتسيل دموعك ع الحجر
وتفتته
يصبح تراب والحقيقه تبعتره
بعت الحلم يا مسكين
وخلاص بقيت
تايه مع التايهين
يا قلبى ع اللى منك
يا ظلمك لللى منك
جاحد يا قلب غادر
غادر يا ظلم فاجر
فاجر يا فكر قادر
بتغير الاقدار
بتحطم الاسوار
بتضيع وبتضيع
وبتفتش الاسرار